Saturday, May 17, 2008

திருநங்கை

வசதியாய் பிறக்கின்றோம்
வறுமையில் வீழ்கின்றோம்
வேதனையில் உழல்கின்றோம்

மதிக்கவும் நாதியில்லை
மனிதர்களாய் வாழ்திடவுமில்லை
மிதித்தனர் எங்களை புழுவாய்

வெகுண்டு எழுந்தோம்- ஆனால்
புறக்கணிக்கப்பட்டோம் புண்படுத்தப்பட்டோம்
வலிகள் ரனங்களாயின!!

உண்ணும் உணவினை
இரந்து உண்டோம்!!
உடையால் நடையால் பரிகாசிக்கப்பட்டோம்

கேலிச் சித்திரங்களானோம்
கேலி பேசும் கயவர்களை
கிலியால் விரட்டினோம்!!

நாதியற்று நாய்போல்
நடோடியாய் வாழ்ந்திட்ட
நாங்களும் இனி
திருநங்கைகள் ஆனோம்!!

அண்மையில் தமிழக அரசு அரவாணிகளை திருநங்கைகள் என அறிவித்தை அந்த புரட்சி அறிவிப்பினை வரவேற்று கவிதை - திருநங்கை பாடுவது போல்!!

Thursday, May 8, 2008

அன்னக்கிளியே!!

ஏன் இவ்வளவு ஓய்வில்லா உழைப்பு என்று ஆசை மனையாள் மன்னவனைக் கேட்க அவன் கூறும் பதில் கவிதையாய்...

அன்னம் கிடைக்கத்தான் திண்டாட்டம் அன்னக்கிளியே!!
திண்ணத்தோடு வாழ்க்கை போராட்டம் அன்னக்கிளியே!!

வண்ணமில்லா வாழ்வுதான் நம் வாழ்வு அன்னக்கிளியே!!
துன்பத்தோடு உழல்வதும் நிரந்தரமாச்சு அன்னக்கிளியே!!

பிணியும் பசியும் நமக்குமட்டுந்தான் அன்னக்கிளியே!!- பேச
துணிவும் இன்றி செக்கு மாடு போல் உழைக்கிறோம் அன்னக்கிளியே!!

கண்ணியத்தோடு வாழதான் அன்னக்கிளியே!!
காலந்தோறும் கண்ணீரில் மிதக்கனும் அன்னக்கிளியே!!

நாணிட வேண்டும் நாய் பொழப்பு நமதாச்சு அன்னக்கிளியே!!
நாயிலும் சாதி உண்டு இந்த நாட்டிலே அன்னக்கிளியே!!

பண்டாரங்களும் புண்ணியம் செய்தவை நம்நாட்டில் அன்னக்கிளியே!!
பாட்டாளி கூட்டம் கூனிப்போன சமூகம் அன்னக்கிளியே!!

பேசி பயனென்ன அன்னக்கிளியே!!
வாய் சொல்லில் வீரர் உண்டு நம்மில் அன்னக்கிளியே!!

களைப்பு போக தூங்கணும் அன்னக்கிளியே!!
காலை வேலை இருக்கு அன்னக்கிளியே!!

Wednesday, May 7, 2008

கவி

எனை கவி பாட வைத்த என் கவியே
உனை வர்ணிக்கும் என் கவியை கேள் சகியே - என்
மனம் கவி போல் தாவுகின்றது - என்னவளே,
உனை கண்டதால் கவி பாடினேன்- எனை
நிராகரித்து காட்டில் அலையும் கவியாய் மாற்றிடாதே!!

கவி - என்றால் கவிதை என்றும்
பொருள் உண்டுகவி - என்றால் குரங்கு என்றும் பொருள் உண்டு
இரண்டையும் கொண்டு எழுதிய கவிதை!!

Tuesday, May 6, 2008

செல்வக் குழந்தாய

புன்னகை மாறா செல்வக் குழந்தாய்,
பூமிதனில் பூத்த வாடா மலரே!!

பொல்லா உலகிலே நியும் புழுதியாய் மாறாமல்
பொங்கிடும் அறிவால் - பகுத்தறிவால்(ள்) வென்றிடு!!

என்றும் அன்பினை அகத்தில் கொண்டு
ஏற்றமாய் அகிலத்தை அடக்கமாய் ஆண்டிடு

வாழ்க்கையில் துன்பம் துளை போடும் - நீ
விளக்காய் உனை கொண்டு துளையை தூளாக்கிடு

மனிதம் வளர்த்து மனுடத்தில் மெல்ல
மாற்றத்தை உன் கொள்கையால் கொணர்ந்திடு

புரட்சி தீயால் புரட்டு பேசி ஏய்த்திடும் ஏத்தர்களை
புரட்டி போடும் கோடாரியாய் இருந்திடு

மூடத்தனத்தில் மூழ்கிய சமூகத்தை சுயசிந்தனையால்
முன்னேற்றப் பாதையில் முனைப்போடு நகர்த்திடு

சில அரசியல் திமிங்கலங்களின் திமிரை
சீற்றம் கொண்டு சிலிர்தெழுந்து சிதைத்திடு

வன்முறையால் பாதை மாறிடும் பாதகர்களை உன்
விழி அம்(ன்)பால் வெட்கிட வைத்திடு

புன்னகை மாறா செல்வக் குழந்தாய்,
பூமிதனில் பூத்த வாடா மலரே!!

பொல்லா உலகிலே நியும் புழுதியாய் மாறாமல்
பொங்கிடும் அறிவால் - பகுத்தறிவால்(ள்) வென்றிடு!!

நதியின் கண்ணீர

வானத்தின் கண்ணீராம்
மழை நீர்
பூமிதனை நனைக்கையில்
நதிகள் உருவெடுக்கும்!!-அது
பாம்பினைப்போல் வளைந்து வளைந்து
ஊர்களிடையே ஓடும்போது
மக்கள் நதி நீர் சண்டையால்
பிளவுபட்டு நிற்கையிலே
நதி நீர் கண்ணீர் வடிக்கின்றது
அதனால் தான் கடல் நீர்
உப்பு கரிக்கின்றதோ??

Thursday, April 17, 2008

நினைத்தேன் உனை

நாடினேன் உன் அன்பை

நனைந்தேன் உன் நினைவுகளில் -அது

நனைத்ததே என் உயிரை

நிந்தித்திடாதே எனை

நீக்கிடாதே உன்னிலிருந்து

நியாயம்தான் என் காதல் என

நினைத்திடு ஒரு நிமிடம்

நிச்சயமாய் புரிந்திடும் உனக்கும்

நித்திரையிலும் உனை மறக்காத

நெய்தல் நிலம் போன்ற என்

பாசம் !!

Tuesday, April 15, 2008

எச்சரிக்கை !!எச்சரிக்கை !!

எல்லாம் வாருங்க
எல்லாம் கேளுங்க
தமிழனத்தின்
கதை இதுங்க!!
வீரத்தமிழனின்
கதை இதுங்க!!
நாடும் , வீடும்
துறந்து போனான்
கடலும் , மலையும்
கடந்து போனான்
காசும், பணமும்
சேரக்கண்டான்
புகழும், மாலையும்
சேரக்கண்டான்- ஆனா
மதிப்பு மட்டும்
வந்து சேரலங்க!!
மிதிப்பும் கொதிப்பும்
தான் மிச்சமுங்க!!
வாழ நாடு கேட்டா?
ஈழத்தில் படுகொலைங்க!!
மலேசியாவும் தமிழனைத்தான்
தீண்டுதுங்க!!
குடிக்க தண்ணீர் கேட்டா
ஆந்திரா ஆத்திரத்தில ஆடுதுங்க
கேரளம் அணையைத்தான் கட்டுதுங்க
கர்நாடகம் கருநாகமா கொத்துதுங்க!!
பயிர் வாட்டத்த
போக்கத்தான் தண்ணீர் வரலங்க
உயிர் வாட்டத்த போக்கவும்
தண்ணீர் வரலங்க
இளிச்ச வாய் இனம்
தமிழினம் என்பதா?
வந்தோரை வாழ வைத்து
வீழ்ந்த இனம் என்பதா?
ஆனா ஒண்ணு மட்டும் நிச்சயமுங்க
தமிழனின் வீரம் மட்டும் சாகலங்க
உணர்வும்தான் தீரலங்க
நீர்பூத்த நெருப்பா என்றுமே இருக்குமுங்க
ஒரு நாள் அதுவும் தான் வெடிக்குமுங்க
தீண்டியோரை தீக்கிரையாக்குமுங்க
புறநானூற்று வீரத்தமிழன்
புறமுதுகு காட்டி பகைவரைத்தான்
விரட்டும் வரை
பூமிதனில் தன் புகழை
நிலை நாட்டும் வரை
இல்லை எவர்க்கும் கண்ணுறக்கமுங்க
இது வாய் சவடால் இல்லங்க
எச்சரிக்கை !!எச்சரிக்கை !!